ડાયાબિટીસના નિયમનમાં ટેકનોલોજી સંબંધિત પ્રગતિએ ડાયાબિટીસની સારવાર અને નિરીક્ષણમાં ક્રાંતિ લાવી દીધી છે, જેણે ઇન્સ્યુલિનની ડીલિવરીમાં સ્થિતિસ્થાપકતાને અને ડાયાબિટીસના દર્દીઓ માટે જીવનની ગુણવત્તા સુધારવાની શક્યતાને વધારી દીધી છે. ટાઇપ 2 ડાયાબિટીસ ધરાવતા એવા લોકો જેમને ઇન્સ્યુલિનની જરૂર છે, તેમને આ ટેકનોલોજીઓ તેમની સ્થિતિને સારી રીતે નિયમન કરવાનું સાધન પૂરું પાડે છે.

આવું જ એક જરૂરી ઉપકરણ બ્લડ ગ્લુકોઝ મીટર છે, ખાસ કરીને એવા લોકો માટે જેઓ ઇન્સ્યુલિન લે છે. દિવસમાં એકથી વધારે વખત બ્લડ શુગર લેવલને માપીને આ મીટર ઇન્સ્યુલિનની માત્રાની અસરકારકતા નક્કી કરવામાં મદદરૂપ થાય છે અને જો જરૂર લાગે તો એડજેસ્ટમેન્ટ કરવાનું શક્ય બનાવે છે. કેટલાક મીટરોમાં આ પરિણામોને કમ્પ્યૂટરમાં ડાઉનલૉડ કરવાની પણ સુવિધા આપે છે, જેની મદદથી તમારા હેલ્થકૅર પ્રોવાઇડર નિરીક્ષણ અને એડજેસ્ટમેન્ટ કરી શકે છે.

બ્લડ ગ્લુકોઝનું સતત નિરીક્ષણ કરવું એ વધુ ઑટોમેટેડ અભિગમ પૂરો પાડે છે. આ પ્રકારના ઉપકરણો નાનકડા સેન્સરનો ઉપયોગ કરે છે, જેને દિવસ-રાત બ્લડ શુગરના લેવલને માપવા માટે ચામડીની નીચે મૂકવામાં આવે છે. તેના ડેટાને રીસીવર કે પમ્પમાં મોકલવામાં આવે છે, જેના લીધે એક વ્યાપક ઝાંખી મેળવવાનું અને સારવારમાં સુધારો-વધારો કરવાનું શક્ય બને છે. તે ખાસ કરીને ટાઇપ 1 ડાયાબિટીસ ધરાવતા દર્દીઓને મદદરૂપ થાય છે, જોકે, ટાઇપ-2ના ડાયાબિટીસના દર્દીઓને તેનો લાભ મળે છે, તે નિશ્ચિત નથી.

સ્ટિક-ફ્રી ગ્લુકોઝ ટેસ્ટિંગ કે જે કન્ટિન્યૂઅસ ગ્લુકોઝ મોનિટરિંગ (સીજીએમ) તરીકે પણ ઓળખાય છે, તે વારંવાર આંગળીને વીંધવામાંથી મુક્તિ મેળવવાનો એક વિકલ્પ છે. સીજીએમ બ્લડ શુગરના લેવલને માપવા માટે ચામડીની નીચે દાખલ કરવામાં આવતું નાનકડું સેન્સર છે, જે પમ્પ કે સ્માર્ટફોન જેવા ઉપકરણમાં તેના પરિણામોને વાયરલેસ રીતે મોકલી આપે છે.

ઇન્સ્યુલિન પેન એ સીરિંજનો અનુકૂળ આવે તેવો વિકલ્પ છે. આ પેન જેવા ઉપકરણોમાં પહેલેથી જ ઇન્સ્યુલિન ભરેલું હોય છે અથવા તો તે બદલી શકાય તેવી કાર્ટ્રિજ સાથે આવે છે. ઇન્સ્યુસિન યુનિટ્સ પ્રોગ્રામ કરેલા હોય છે અને ઇન્સ્યુલિનને ઝડપથી અને સરળતાથી પૂરું પાડવા માટે સોયને ચામડીમાં દાખલ કરવામાં આવે છે.

ઇન્સ્યુલિન પમ્પ્સ સમગ્ર દિવસ દરમિયાન ઇન્સ્યુલિનના એકથી વધારે ડૉઝની જરૂરિયાત ધરાવતા લોકો માટે અનુકૂળ છે. ખિસ્સામાં મૂકી શકાય એટલું આ નાનકડું ઉપકરણ એક પાતળી ટ્યુબ મારફતે ઇન્સ્યુલિન પૂરું પાડે છે અને સોયને ચામડીની નીચે દાખલ કરવામાં આવે છે. પમ્પ સમગ્ર દિવસ દરમિયાન બેઝલ ઇન્સ્યુલિન અને બોલસ ડૉઝ એમ જરૂરિયાત મુજબ બંને પૂરાં પાડી શકે છે.

જેટ ઇન્જેક્ટર્સ એ ઇન્સ્યુલિન પહોંચાડવા માટેનો સોય વગરનો વિકલ્પ છે, જે ચામડી મારફતે ઇન્સ્યુલિન આપવા હાઈ-પ્રેશરાઇઝ્ડ એરનો ઉપયોગ કરે છે. જોકે, આ ઉપકરણો ખૂબ મોંઘા હોઈ શકે છે અને સીરિંજ અને પેનની સરખામણીએ વધુ જટિલ પણ હોઈ શકે છે.

પ્રત્યેક ઉપકરણના લાભ અને ગેરલાભને સમજવા માટે તમારા હેલ્થકૅર પ્રોવાઇડર અને ડાયાબિટીસ એજ્યુકેટરની સાથે આ વિવિધ વિકલ્પોની ચર્ચા કરવી જરૂરી છે. વાસ્તવિક અપેક્ષાઓ રાખવી અને પસંદ કરવામાં આવેલી ટેકનોલોજીને શીખવા અને અપનાવવા માટે પ્રેરિત થવું એ ડાયાબિટીસના સફળ મેનેજમેન્ટની ચાવી છે. આખરે એમ કહી શકાય કે, ડાયાબિટીસ સંબંધિત ટેકનોલોજીઓમાં સાધવામાં આવેલી પ્રગતિનો ઉદ્દેશ્ય ડાયાબિટીસના દર્દીઓ માટે સ્થિતિસ્થાપકતા, ગ્લુકોઝના નિયંત્રણ અને જીવનની એકંદર ગુણવત્તાને સુધારવાનો છે.^18,19