ভাৰতীয় উৎসৱৰ গোটেই বতৰটোত ডায়েবেটিছ চম্ভালি ৰাখিব।
ডায়েবেটিছ থকা লোকসকলৰ মাজত গোটেই বছৰটো ডায়েবেটিছ নিয়ন্ত্ৰণ কৰাৰ যোগেদি, মৃত্যু আৰু বিকলাঙ্গতাৰ প্ৰাথমিক কাৰণ স্বৰূপ হৃদৰোগ, ষ্ট্ৰোক আৰু দূৰাৰোগ্য বৃক্ক ৰোগৰ দৰে জটিলতাসমূহৰ পৰা ৰক্ষা পাব পাৰি। অৱশ্যে, উৎসৱৰ বতৰত হয়তো এই কাম কৰাটো বিশেষভাৱে কঠিন হ'ব।
"দিৱালী"ৰ দৰে উৎসৱবোৰৰ কেন্দ্ৰবিন্দুৱেই হৈছে খাদ্য, য'ত প্ৰায়ে প্ৰচুৰ পৰিমাণে ভজা, অধিক চৰ্বিযুক্ত খাদ্য আৰু মিঠাইৰে ভৰপূৰ বৃহৎ নৈশভোজবোৰ অন্তৰ্ভুক্ত থাকে যিবোৰত মাত্ৰাধিক কেল'ৰি থকাৰ লগতে চেনী আৰু ঘিউৰে পৰিপূৰ্ণ হয়। ইয়াৰ উপৰিও, দিৱালীৰ সময়ত আদান-প্ৰদান কৰা আটাইতকৈ জনপ্ৰিয় উপহাৰটোৱেই হৈছে মিঠাই আৰু অতি বেছি কেল'ৰি থকা শুকান ফল-মূলবোৰ। ডায়েবেটিছ থকা লোকসকলকে ধৰি বেছিভাগ লোকেই অতি বেছি কেল'ৰি আৰু চেনীযুক্ত খাদ্য বহু বেছিকৈ ভোজন কৰিব পাৰে, যি তেওঁলোকৰ ব্লাড ছুগাৰৰ মাত্ৰাসমূহ প্ৰভাৱিত কৰিব পাৰে।
ভোজ আৰু উপবাস দুয়োটাৰ দ্বাৰাই ব্লাড ছুগাৰৰ মাত্ৰাবোৰ প্ৰভাৱিত হ'ব পাৰে। বহু সময় নোখোৱাকৈ থকাৰ ফলত হাইপোগ্লাইচেমিয়া বা নিম্ন ব্লাড ছুগাৰ হোৱাৰ বিপৰীতে বেছিকৈ ভোজন কৰাৰ ফলত, বিশেষকৈ চেনীযুক্ত আৰু চৰ্বিযুক্ত খাদ্যবোৰে হাইপাৰগ্লাইচেমিয়া সৃষ্টি কৰিব পাৰে বা ব্লাড ছুগাৰৰ মাত্ৰাসমূহ বৃদ্ধি কৰিব পাৰে। অনিয়মীয়া ধৰণে ভোজন কৰাৰ ফলত এটা সাম্ভাব্য মাৰাত্মক অৱস্থা ডায়েবেটিক কিট'এচিডোচিছ আৰু ডিহাইড্ৰেশ্যন হ'ব পাৰে। এই জটিলতাবোৰ এৰাই চলিবলৈ, কিছুমান ব্যক্তিয়ে আনকি নিজৰ ডায়েবেটিছ নিদানৰ ঔষধপালিও সলনি কৰিবলগীয়া হ'ব পাৰে।
বহুতো লোকৰ ক্ষেত্ৰত, উৎসৱবোৰে ব্লাড ছুগাৰৰ মাত্ৰা বৃদ্ধি কৰা মানসিক চাপপূৰ্ণ সময়বোৰ লৈ আহিব পাৰে। ৰোগীসকলৰ বাবে নিয়মীয়া টোপনি বা ব্যায়ামৰ ৰুটিন বৰ্তাই ৰখাটো কঠিন হ'ব পাৰে। শেষত গৈ ডায়েবেটিছ ৰোগীসকলে ঔষধৰ পালিবোৰ ল'বলৈ পাহৰি যাব পাৰে আৰু নিজৰ ব্লাড ছুগাৰৰ মাত্ৰাবোৰ পৰ্যাপ্তভাৱে নিৰীক্ষণ নকৰিবও পাৰে।
আপোনাৰ ডায়েবেটিছ চিকিৎসা পৰিকল্পনা অনুকৰণ কৰাত আৰু এক স্বাস্থ্যকৰ জীৱনশৈলীৰ দিশে অগ্ৰসৰ হোৱাত আপোনাক সহায় কৰিবলৈ ইয়াত কিছুমান সূচক দিয়া হৈছে:
- গোটেই দিনটো নিয়মীয়া, স্বাস্থ্যকৰ আহাৰ খাই থাকিব। আহাৰবোৰ সময়সূচী মতে খাব আৰু অধিক কেল'ৰি তথা চেনীযুক্ত খাদ্যৰ পৰা আঁতৰি থাকিব।
- পৰৱৰ্তী পৰ্যায়ত বিপদলৈ ঠেলি দিয়া উৎসৱৰ খাদ্য অত্যাধিক পৰিমাণে ভোজন কৰাৰ সম্ভাৱনা হ্ৰাস কৰিবলৈ, উৎসৱমুখৰ দিনবোৰৰ আগত পুষ্টিকৰ, কম চৰ্বিযুক্ত লঘু আহাৰবোৰ খাবলৈ চেষ্টা কৰিব আৰু উৎসৱমূলক ব্যঞ্জনবোৰ অতি কম পৰিমাণে খাব।
- নিজৰ খাদ্য নিজেই প্ৰস্তুত কৰাৰ কথা ভাবিব।
- মিঠাইবোৰ বনাওঁতে সৰ তোলা বা কম চৰ্বিযুক্ত গাখীৰ ব্যৱহাৰ কৰিব।
- উপাদানবোৰৰ পৰিমাণটো হ্ৰাস কৰিব। উদাহৰণ স্বৰূপে, চেনীৰ পৰিমাণ আধালৈ কমাই আনিব।
- ভজা খাদ্যৰ সলনি সেকা খাদ্যবোৰ খাব।
- যথেষ্ট পৰিমাণৰ পানী আৰু কম চেনীযুক্ত পানীয় খাই হাইড্ৰেটেড বা জলসমৃদ্ধ হৈ থাকিব।
- নিয়মীয়া শাৰীৰিক কাৰ্যকলাপত লিপ্ত হোৱাটো অব্যাহত ৰাখিব। যিকোনো উদযাপনমূলক অনুষ্ঠানত অংশগ্ৰহণ কৰাৰ আগতে, ৰাতিপুৱাতে ব্যায়াম কৰি ল'বলৈ চেষ্টা কৰিব।
- নিৰ্দেশনা অনুসৰি, ঔষধ-পাতি নিয়মীয়াকৈ সেৱন কৰিব। ঔষধৰ পালিবোৰ ল'বলৈ পাহৰি নাযাবৰ বাবে কিছুমান ৰিমাইণ্ডাৰ ধাৰ্য কৰিব। আপোনাৰ ঔষধৰ পালিটো আপুনি সলনি কৰিবলগীয়া হ'লে, আপোনাৰ চিকিৎসকৰ পৰামৰ্শ ল'ব।
- ব্লাড ছুগাৰৰ মাত্ৰাবোৰ নিয়মীয়াকৈ পৰীক্ষা কৰিব, বিশেষকৈ উপবাসৰ সময় বাঢ়ি যোৱাৰ পিছত।
- হাইপাৰগ্লাইচেমিয়া, হাইপোগ্লাইচেমিয়া আদিৰ দৰে সমস্যাবোৰ লক্ষ্য কৰি থাকিব আৰু আগলৈও লক্ষ্য ৰাখিব। ৰোগী আৰু তেওঁলোকৰ পৰিয়ালবৰ্গই সাম্ভাব্য সমস্যাবোৰৰ বিষয়ে সজাগ হ'ব লাগে যাতে তেওঁলোকে নিজৰ চিকিৎসকক লগে লগে অৱগত কৰিব পাৰে।
- নিয়মীয়াকৈ প্ৰাণায়াম কৰি মানসিক চাপ হ্ৰাস কৰিব।
- পৰ্যাপ্ত পৰিমাণে শুব আৰু জিৰণি ল'ব।(57,.,61)
